TXITA PROIEKTUA

 

Txita proiektua   Arroako eskolan haur hezkuntzakoek “Baserriko animaliak” proiektua lantzen ari garenez, 4 eta 5 urteko gelan azaroaren 10ean inkubagailua jarri genuen martxan. Bertan ernaldutako hamabi arrautza sartu genituen. Haurrek egunero, 18 egunetan arrautzei, poliki-poliki buelta ematen aritu dira (azkenengo hiru egunetan ez baitira mugitu behar). Bestalde, tenperatura eta hezetasuna zaintzen arduratu dira, ondoren paperean erregistratzeko.   Lehenengo egunean bideo bat ikusi zuten txiten enbrioi garapena nolakoa den ikusteko. Arrakasta handia izan zuen bideoak eta, egunez egun, arrautzaren barruan zer gertatzen den ikasi dute. Argazkiak atera eta egunero haur batek idatzi du zer gertatzen den arrautza barruan. Horrela, pixkanaka, txita proiektu izeneko liburuxka osatzen joan dira.   21 egun behar dira txitak jaiotzeko eta azaroaren 30ean, astelehenean, jaio behar ziren, baino, eskerrak inkubagailua etxera eraman genuela, badaezpada, zeren txita bat igandean jaio zen eta beste bat astelehenean goizaldean. A ze poza haurrak eskolara iritsi zirenean eta bi txita ikusi zituztenean!!! Ze emozioa!!! Ondoren, egunean zehar, beste bost txita jaiotzen ikusi zituzten. Denak horiak eta azkena, haurrak etxera joan zirenean, beltza. A ze sorpresa hartu zuten hurrengo egunean txita beltza ikusi zutenean!   Oso esperientzia hunkigarria eta ederra izan da eta umeen partehartzea eta inplikazioa bikaina. Zuzenean biziz ikasi dute prozesu osoa nola den, zer jaten duten…, azken finean, errespetuz nola zaindu behar diren…